Fakulteti i Edukimit i Universitetit të Prishtinës ka miratuar Agjendën Institucionale të Kërkimit Shkencor 2026–2030, një dokument strategjik që orienton zhvillimin, koordinimin dhe fuqizimin e veprimtarisë kërkimore në Fakultet gjatë pesë viteve të ardhshme.

Agjenda shërben si kornizë institucionale për përcaktimin e prioriteteve kërkimore, funksionalizimin e ekipeve të hulumtimit, ndërlidhjen e kërkimit shkencor me programet MA dhe PhD, si dhe forcimin e kontributit të Fakultetit në zhvillimin e politikave, praktikave dhe reformave arsimore në Kosovë.

Përmes kësaj Agjende, Fakulteti synon të kalojë nga nismat individuale drejt një kulture kërkimore më të koordinuar, ndërdepartamentale, ndërdisiplinore dhe të orientuar drejt ndikimit shkencor, profesional dhe publik.

Agjenda përcakton pesë fusha prioritare të hulumtimit:

1. Mësimdhënia, të nxënit dhe didaktikat lëndore
2. Fëmijëria e hershme: edukimi, zhvillimi dhe mirëqenia e fëmijës
3. Politikat arsimore, udhëheqja dhe qeverisja e reformës
4. Gjithëpërfshirja, barazia dhe drejtësia sociale në arsim
5. Transformimi digjital, inteligjenca artificiale dhe inovacioni në arsim

Këto fusha do të udhëheqin zhvillimin e projekteve kërkimore, publikimeve shkencore, studimeve të nivelit master dhe doktoratë, partneriteteve kombëtare dhe ndërkombëtare, si dhe produkteve profesionale që mbështesin përmirësimin e cilësisë së arsimit.

Agjenda është miratuar nga Këshilli i Fakultetit të Edukimit më 1 qershor 2026 dhe përfaqëson një hap të rëndësishëm drejt konsolidimit të identitetit kërkimor të Fakultetit dhe rritjes së ndikimit të tij në zhvillimet arsimore në vend.

Kliko këtu për të shkarkuar Agjendën Institucionale të Kërkimit Shkencor 2026–2030.